المصدر 7 - عبّر حازم إمام، نجم الزمالك السابق، عن حزنه الشديد لرحيل الكابتن محمد صبري، مؤكداً أن وفاته شكّلت صدمة كبيرة لكل الوسط الرياضي.

وقال إمام في مداخلة عبر قناة الزمالك: "البقاء لله لنا ولكل المصريين. صدمة كبيرة.. مبارح كان بيتواصل معانا، وكان بصحة جيدة. ربنا يصبّر أسرته وبناته وزوجته، ويصبّرنا إحنا كمان.. إحنا جيل عاش مع بعض أكتر مما عاش في بيته".

وأكد إمام أن صبري كان واحدًا من أهم وأمهر لاعبي الزمالك قائلاً: "في جيلنا كان هو الرقم واحد.كلنا كنا شايفين إنه هيبقى حاجة كبيرة جدًا.. وفعلاً هو شيء كبير. لكن ماخدش حقه من الإعلام، واتعرض لمشاكل مفروضة عليه بسبب روحه وغيرته على النادي".

وعن شخصيته، قال: "كان شخصية جميلة وطبيبته لذيذة جدًا.. في المنتخب كان أخف دم في العالم، وكل التجمعات كانت بتبقى عنده في الأوضة. كنا نقعد ورا في الأوتوبيس نهزر ونضحك مع بعض".

وتحدث إمام عن تطور صبري بعد اعتزاله: "لما كبر، اتطور جدًا إعلاميًا، وبقى مذيع محترم بيهتم بكل كلمة. واشتغل لسنين طويلة مدربًا في القطاع وفي الفريق الأول. لعب، ودرب، واشتغل إعلام… ربنا يرحمه".

وأشار إلى أنه خارج مصر ولن يستطيع العودة سريعًا قائلاً: "للأسف بره مصر بسبب الشغل، وعرفت الخبر الصبح.. وجمال حمزة كلمني".

وشدد حازم إمام على ضرورة تكريم الراحل قائلاً: "محمد صبري يستاهل حاجة كبيرة، وأنا واثق إن إدارة الزمالك هتعمل حاجة تليق بيه. وهو شاف النهارده حب الجماهير على مستوى مصر كلها مش الزمالك بس".

وانتقد إمام ظاهرة التجريح في كرة القدم، قائلاً: "للأسف الناس مش بتفوق غير لما حد يمشي. بعدها نقول الكورة مش مستاهلة.. وبعد يومين نرجع للي كنا فيه. السوشيال ميديا ليها فوائد، لكن ليها عيوب خطيرة جدًا.. الشتيمة بتوصل للشخص نفسه وتحبطه نفسيًا".

وأضاف: "يا ريت اللي حصل النهارده يخلي الناس تنتقد باحترام.. في الآخر إحنا بنتكلم عن كورة".

واختتم كلامه عن الراحل قائلاً: "كلنا بنحب صبري، ومفيش حد يعرفه إلا ويحبه. عمره ما عمل حاجة وحشة، وكان دايمًا قلبه أبيض. ورغم إننا كنا في نفس المركز، عمره ما زعل، وكان دايمًا يتكلم عني بأحسن كلام، كان أحرف واحد في جيلنا، وحاجة نفتخر بيها.. ربنا يرحمه ويغفر له ويرفع درجاته".